Ejjew Nagħmlu Festa
Għal ħafna minna llum il-Festa saret tfisser biss marċijiet, murtali u xi drabi ukoll tbaħrid. Ftit huma dawk fostna li l-festa għalihom qabel kollox tfisser l-aspett reliġjuż.
Fil-jiem li ġejjin fix-Xlendi ser niċċelebraw il-festa tal-Patruna tagħna l-Madonna tal-Karmnu. Din il-festa għandha tfakkarna li Marija Omm il-Feddej hemm bżonn tkun il-qofol ta’ ħajjitna u fil-qofol tal-familji tagħna. Kemm hemm bżonn ngħixu u nduqu mill-imħabba ta’ din l-Omm li rabbiet l-Iben t’Alla. Hemm bżonn li nisktu mill-istorbju tal-ħajja u bħal Marija nagħtu aktar widen għall-Kelma t’Alla. Kemm hemm bżonn li f’mumenti diffiċli u ta’ tbatija ma naqtgħu qatt qalbna u nitolbu lil Marija li għexet il-mument tas-salib. Hemm bżonn li naċċettaw aktar lil xulxin u lill-oħrajn, mingħajr ebda preġudizzji kif Marija dejjem kienet lesta li tisma’ u tgħin lill-proxxmu. Jeħtiġilna bħal Marija nitolbu iktar ħalli nagħarfu x’inhi r-rieda t’Alla f’ħajjitna.
Il-Festa li ser niċċelebraw madwar il-Madonna tal-Karmnu għandha tkun okkażjoni ta’ riflessjoni fuq kemm tassew in-nisrani (int u jien u aħna lkoll) qiegħed jagħraf lil Marija bħala mudell ta’ ħajja ta’ kif wieħed jgħix il-kelma u l-preżenza t’Alla tkun ħaġa tajba li fil-jiem tal-Festa nersqu lejn is-sagramenti tal-qrar u t-tqarbin u nieħdu sehem fil-funzjonijiet tal-knisja, bħala mumenti ta’ grazzja tal-Kelma t’Alla u tal-preżenza ta’ Alla f’ħajjitna.
Hekk il-Festa ma tkunx biss marċijet, logħob tal-baħar, u serati ta’ kant u divertiment soċjali, imma l-festa mill-aspett reliġjuż tagħha ssir ċelebrazzjoni ta’ radd il-ħajr lil Alla għax tana lil Sidtna Marija, bħala Ommna. Marija Omm il-Karmelu u Patruna Tagħna tkompli tħares din il-Komunità ċkejkna tax-Xlendi, fis-sejħa għall-ħajja sħiħa f’dak li jrid il-Mulej minn kull nisrani.
Għeżież il-Mulej iberikkom u Marija Omm il-Karmelu tħariskom fil-ħajja.
Ejjew Nagħmlu Festa!
Il-festa t-Tajba lil kullħadd
Kan. Giovanni Cremona